Verse
Taburettli
Der Kurt isch furt, das schint sech z lohne,
är cha jez meh deheime wohne.
Fürs Bürgi wott är witer bügle,
bis är is Wängistei muess zügle.
Der Ueli und au s Simonettli,
verlöh s politische Parkettli.
Si hei ke Luscht me zum Regiere,
das sött au angerne passiere.
Dr Federer und der Beat Feuz,
möge nümme es fäut ne der Spöiz.
Hei scho gnue uf der höche Kante,
si haut nid CS Spekulante.
Der Papscht in Ränte jo z Rom unge,
het jez si ewigi Rueh gfunge.
Wohi ne der Petrus duet schicke,
das wüsse nid mou d Katholike.
Ar Downingstreet ten bi de Brite,
het s Huus letscht Johr wahnsinnig glitte.
Es Ine Use mit Chaote,
s isch fasch zum Stundehotel worde.
Au z Ängland thronet s Lisebettli,
nüm uf sim edle Taburettli.
Si höcklet jez bim Petrus obe,
und luegt «the crown» uf Netflix zobe.