Verse
Irrfahrt
Fahre heizue Richtig Stedtli, do uf ei Mou chunts mer z Sinn.
Sett no poschte, ha ke Brot me und e Umwäg lit nid drin.
Zum Glück gits jo do im Oschte vo der Stadt au es Migros,
do fahr i grad schnäu mou zueche, hani mir de fescht vorgno.
Chume z fahre, stöu der Blinker, doch was gsehni, das goht nid.
Links abbiege isch verbotte, was isch das de fürne Shit.
Fahre witer Richtig Kreisu, jo klar d Ample isch jez rot.
S Bipperlisi chunt jez au no und der ganz Verkehr dä stoht.
Wenn i mir jez no vorstöue, dass do wär e zwöiti Spur,
de cha ig de chum no schnuufe, froge mi, was söu das nur.
Ume Kreisu zrug zum Migros, ändlech chani s Brot go poschte,
chume use, jez schnäu hei, doch was isch das do fürne Pfoschte.
Links abbiege isch verbotte, bechum Vögu, das chas nid si.
Richtig Stärne muessi fahre und bieg id St. Niklausstross i.
Bi jez vüu z spot, muess jez schnäu hei, gibe Gas, scho ischs passiert.
Bi meh aus die 30gi gfahre, s het mi blitzt, ha z fescht pressiert.
I bi jeze fix und fertig, was söu de die blödi Irrfahrt?
Werum muessi dur d St. Niklausstross, ig ärgre mi derart.
Jo mir säge euch, mir wüsse, was si wei mit dere Tour.
Finanziere mit em Buessgäud vo üs aune d Doppuspur.