Verse
Konferänz
Der Mösiö Macron, chef de la grande nation,
dä het es Problem mit der Räntereform.
Die vile gilets jaunes, die sage a sim Thron
und stürze fasch der Möchtegärnnapoleon.
Der Mösiö Macron, lütet em Pirmin a,
är isch der Ma wo d Lösig für ihn bringe cha.
Dä seit das kenni au, ha drum e jungi Frau.
Die luegt für mi aus Räntner sicher einisch au.
Jo d Merkel Angela, d Muetter Germania,
die sött jez ändlech mau e Amtsnachfouger ha.
Doch wenn si dänkt do dra, de foht der Zittri a,
wöu d CDU die het ke Ma mit Charisma.
Jo d Merkel Angela, lütet am Putin a,
wöu d Russe hei für Dütschland gäng e Lösig gha.
Los liebi Angela, du muesch ke Nochfoug ha,
machs so wie ig, ig chume immer wider dra.
Der Recep Erdogan, der türkischi Sultan,
dä lidet schrecklech fescht unger sim Grössewahn.
Dä Ma dä suecht e Plan, wot si wie Dschingis Khan
und herrsche vom Balkan bis über Pakistan.
Är lütet em Trump a, däm vöu beschäftigt Ma.
Doch är verzwiflet, das är ihn nid spräche cha.
Uf Twitter nüt me steit, der Trump dä Löu dä schreit,
bim Bisle isch ihm s Handy grad is WC gheit.